香港女首富丨甘比耐心親教混血肥仔鈎織　陳凱韻自揭經營小店原因

娛樂

撰文： TOPick柴犬出動

發布時間： 2024/05/12 14:14

最後更新： 2024/05/12 22:32

熱門保暖大法財政預算案2025 超市大搜查名校專區啟德體育園聖誕好去處藥物百科破·地獄小學試題會員有獎

▲ 甘比教混血肥仔學鈎織，過程搞笑。

混血肥仔（曾達恩）主理的多媒體頻道BBO（Black Box Office）繼早前請來古天樂（古仔）作客旅遊真人騷《尋泰記》，最近再邀請另一重量級嘉賓亮相訪談節目《地球人生活指南》，她便是香港女首富甘比（陳凱韻）。

在節目中，甘比讓混血肥仔先後踩入她銅鑼灣的鈎織工作室和門市「搞搞震」，不但親自傳授鈎織技巧，更分享了有關經營小店的窩心點滴。

娛樂大亨｜古天樂分享「斷食法」建議要習慣肚餓　古生：餓起碼4至6個鐘頭以上

▲ 甘比亮相BBO節目《地球人生活指南》擔任嘉賓。

「屎形」精品受歡迎

甫到達工作室，混血肥仔就發現裏面有大量可愛鈎織擺設，當中更有不少是「屎形」精品，甘比向一臉好奇的混血肥仔解畫：「嚿屎其實有段古，我好朋友，其實係Sammi（鄭秀文），叫我織嚿屎就大受歡迎！其實屎喺日文叫『unko』，同好運發音好似，日本年青人好鍾意做一個屎形狀嘅手勢，其實係祝福嚟。」

除有趣擺設外，工作室亦有不少加上「Handmade By Kimbee」小牌的鈎織手袋，混血肥仔一度以為它們售價不菲，但一睇價錢牌即忍不住說：「比我想像中平好多喎！」

甘比分享箇中原因：「開頭開鋪頭嘅時候，啲同事就成日話：『唔得㗎，你織要賣貴啲。』，我成日都同佢哋好爭拗嘅，我就覺得大家都織到嘅，就一定要同大家一樣嘅價錢。」

▲ 混血肥仔發現甘比親手製作的鈎織袋定價比想像中便宜。

甘比改變心態不再心急

甘比在工作室身兼多職，既是老闆，又是買手，更是其中一位導師，自言以前性急的她就指自己現在是名有耐性的導師：「好急，好急，好鍾意好急，但係我放慢咗喇，其實我除咗自己急之外，我曾經覺得自己迫害其他人，逼到其他人都好急，但係有一刻我醒咗喇，我就覺得如果我追嗰個人，我追佢嘅時候可能只係快3分鐘啫，咁我就唔好逼佢喇。」

而她教授混血肥仔鈎織的過程中除盡顯耐心一面，還展示充滿愛心的一面，邊教邊向對方派「心靈雞湯」：「做人要識轉彎，要轉膊」、「每個人都好有創意，你唔好以為自己嗰個好核突」。

▲ 混血肥仔用心織袋

學習鈎織與兒子有關

教授期間亦有不少搞笑對答，例如混血肥仔發現自己織出來的洞比正常大後，甘比向他解答原因：「因為你手鬆，我哋手緊啲，咁我唔問你借錢好冇？」引來混血肥仔回應：「都好難喇！」搞到兩人忍俊不禁。

問到學習鈎織的原因，甘比坦言與兒子劉仲學有關：「疫情咪online school嘅，我冇嘢做咪拎兩支嘢咁織，無端端我個仔有一日就話『媽媽，我呢要兩嚿嘢』，我心諗：『死喇，呢個唔係織，係鈎喎』，咁我就唔知點算好，跟住終於搵到有賣呢類毛冷嘅地方，但係就唔明點樣鈎，問嗰個阿姐可唔可以教我，佢話：『唔得，我唔可以教你』，我直情想喊，後尾咪自己上網同搵人教睇圖再自己學囉。」

▼點擊圖片放大

讓一眾靚媽排解情緒

另外，甘比也分享一件教班的難忘事：「有個媽媽嚟上堂，我就多口問佢嘢，佢話佢織畀個女，我問佢：『得一個女呀？』，佢就無端喊晒口同我講：『唔係呀，兩個女』，『咁你織埋畀細女』，跟住佢就細細聲做口形話：『佢唔喺度，佢走咗』，佢喺度喊，我又忍住喊。佢走嗰時我就攬住佢，拍拍佢，我就送咗啲嘢畀佢個女，因為佢第一次織唔係咁靚，我就將我嗰個畀埋佢。」

拜訪完工作室，混血肥仔還落到門市觀摩，過程中甘比透露門市朝早10點開門，是想一班媽媽能夠在送完子女返學後有機會排解情緒，以及建立存在感。

▲ 混血肥仔到甘比鈎織店門市參觀。